مكياج

تعرفي علي أفضل 4 ماسكرا في عام 2019 بالصور و الاسعار

الماسكرا هي اكتر حاجه بتبرز و بتظهر جمال العيون خصوصا عيون العرب. الماسكرا كمان ممكن تتحط لوحدها على الرموش كل يوم الصبح، لو راحه الجامعة او راحه شغل و عايزه حاجه تتحط بسرعة و متحتاجيش تعيدي عليها كل شويه. لما الماسكرا بتتحط لوحدها بتبان كان شكل الرموش طبيعي بس تتحط بذكاء و عشان لازم نحافظ علي رموشنا لازم نختار كويس اوي نوع الماسكرا المناسبه الي تحافظ عليهم وكمان يكون سعرها مناسب لينا.

قبل ما ابدا اتكلم عن احسن 4 أنواع ماسكرا موجودين في السوق المصري حاليا نقدر نستخدمهم و احنا مطمنين، لازم نكون عارفين ايه أهمية الماسكرا:
1) بتعمل علي تطويل الرموش.
2) بتظهر العيون بشكل جذاب.
3) بتكثف الرموش في أنواع بتكثف الرموش بس و في أنواع بتطولها بس لازم تبقي عارفه ايه المناسب اكتر لعيونك و تستخدميه و في ناس بتكتفي انها تحدد شكل رموشها بيها مش اكتر.

لازم ناخد بالنا من حاجتين.
1) الماسكرا بتتحط مرتين في اليوم مش اكتر علشان نحافظ علي رموشنا من أي ضرار كمان عشان لو عينيك حساسه ميحصلهاش أي ضرر.
2) لازم الماسكرا تتشال من علي الرموش اخر اليوم بلاش بلاش تنامي بيها لان غالبا هتصحي تلاقي عينيكي احمرت.

الماسكرا موجودة ب 3 اشكال مختلفه بودرة و كريم و سائل الي كلنا عارفينه بنستخدمه، مكوناتها بتكون عباره عن نفس المكونات الاساسيه للصبغة و الزيوت و الشمع.

1) ماسكرا ايسنس – Essence I Love Extreme Volume Waterproof Mascara

الماسكرا دي عاملة ضجة رهيبة الفتره الاخيرة و عن تجاربتنا الشخصية و تجربة الناس اللي استخدموها فهي تستاهل الضجة و الشهرة الكبيرة بتاعتها بالنسبة لسعرها اللي يعتبر رخيص مقارنة ب باقي الماركات و كمان أداها اللي اقدر أقول عليه فوق الممتاز.
الفرشة بتاعتها مش كبيرة اوي و مع ذلك هي بتكثف الرموش بشكل كبير و كمان هي ضد المياة يعني مش هتسيح منك في الصيف و الحر ولا هتبوظ شكلك في المصيف. اهم ميزة فيها هو السعر وان سعرها بيبقي من 80 جنيه ل 100 جنيه علي حسب المكان اللي هتشتري منه. يعني ماسكرا ضد المياه بتكثف وبتطول الرموش و ب 80 جنية بس ف تستاهل انها تاخد احسن ماسكرا موجوده حاليا. متوفرة في سوق.كوم و نون و الصيادليات الكبيرة.


2)  الماسكرا  ميبلاين كلوسال – Maybelline NewYork the Colossal Volume Express Mascara

ماسكرا من ميبلاين واكله السوق كله لاكتر من 3 سنين فاتوا، يعني لو سالتي أي حد ايه احسن ماسكرا موجوده هيقولك ميبلاين طبعا. فرشة ميبلاين اضخم من فرشة ايسنس فبالتالي بتعمل كثافة عالية جدا و بتثبت كمان معاكي طول اليوم ولان الفرشه تخينه فصعب انها تسيب كتل علي الرموش لو استخدمتيها صح. الكولوجين من المركبات الاساسية للماسكرا دي و ده بيخليها مبتعملش اضرر للرموش. و لكنها للأسف مش ضد المياة يعني مش هتنفع استخدام يومي معاكي، بمعني انك لو هتسخدميها و انتي راحه الشغل او الجامعة و اضطراتي تغسلي وشك او تتوضي ف كده خلاص الماسكرا راحت و شكلك باظ فبالتالي هي مناسبة اكتر للسهر او الحفلات بليل لكن مش استخدام يومي. طب ازاي شركة بحجم مبيلاين لسه معملتش ماسكرا ضد المياة؟ هي الحقيقة موجودة لكن لسه منزلتش مصر. سعرها بيبدا من 75 جنية لحد 90 جنيه موجودة في مزايا و العزبي و الصيدليات الكبيرة و كمان موجوده اون لاين علي سوق.كوم و نون.


3) هو ماسكرا من لوريال باريس – l’Oreal Paris Mascara Lash Architect

منتجات لوريال باريس الفرنسيه الغنيه عن التعريف في كل منتجات العنايه بالبشره و حتي الشعر و لكن الماسكرا بتاعتها غالية شوية اغلي من المنافسين الموجودين في السوق. بتدي مظهر انيق و غايه في الجمال للعيون مريحه جدا. فرشة الماسكرا دي رفيعة من قدام و قصيرة لكن طويلة من الاخر فشكل الرموش بيها بيكون طبيعي. اهم مميزاتها انها بيدخل في تركبها مجموعة من الزيوت الطبيعة و اهمهم زيت الجوجوبا و زيت النخيل اللي كتير منين ميعرفش انهم مفيدين جدا للشعر. هي مش ضد المياة لكن مناسبة جدا لو بتحبي الميكاب يبان طبيعي او لو هتحطيها هي بس او مع ميكاب خفيف جدا الصبح. لو لسهرة بليل فهي مش انسب اختيار للماسكرا لكن برضو تنفع.  سعارها غالي بصراحة يعني 170 جنيه كتير علي ماسكرا لكن مش كتير علي منتجات لوريال. متوفرة علي سوق.كوم و مزايا.

4) ماسكرا بينفت – Benefit Roller Lash Curling Mascara

شركة بينفت هي شركة راداة في عالم الميكاب و المكياج في العالم، بس هي مش منتشرة اوي في مصر و ده نظرا لاسعارها المبالغ فيها، يعني مثلا الماسكرا دي ب 900 جنيه ف السوال بقي الماسكرا دي هتطلعلي رموش من اول و جديد ولا ايه؟ الماسكرا دي بتحتوي علي فيتامين بي 5 و كمان بتثبت علي الوش لمدة بتوصل لحد ١٢ ساعة. الماسكرا دي بتطول الرموش جامد و بتبعدهم عن بعض و بتخليهم رفيعين يعني عكس أي ماسكرا من اللي فوق، بس في ناس اللي بتحب اللوك ده. كمان شكل العلبة من بره مغري بصراحة. موجودة في سوق.كوم و مزايا.

ودول كانوا احسن 4 أنواع ماسكرا موجودين في السوق حاليا
اختيار الماسكرا بيعتمد علي المكان اللي انتي رايحه و كمان علي الوقت اللي خارجة فية
و في موضوع تاني هنتكلم فيه عن ازاي تختاري الماسكرا في المناسبات

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى